Parc dal Stele

Il Parc dal Stele di Rivignan al è un parc comunâl, nassût de volontât de aministrazion civiche di rinsaldâ il rapuart storic tra la popolazion locâl e l’ambient des risultivis e dai cors di aghe che di li a partissin, inte convinzion che chest rapuart al rapresenti la uniche garanzie reâl pe tutele ative de maraveose nature che a cjatìn dilunc il Stele.

In dut il parc, che al è ancje un Sît di Impuartance Comunitarie, al cjape dentri il biotopo regjonâl “Risultivis di Zarnic”, al ocupe 638 ha, e di chescj 1/3 al è rapresentât di elements naturâi di valôr (boscs, prâts stabii, aghis) e la part che e reste di coltivazions. Un timp, fin a pôc plui di 50 agns fa, la zone e jere ricuvierte di aratîfs, pradariis umidis e palûts, plenis di orchideis e altris speciis raris (come lis carnivoris Drosera rotundifolia e Pinguicola alpina), e di pôs arbui metûts sui ôrs dai prâts.

Cumò, cul abandon des pratichis agriculis tradizionâls, i prâts si son ridots a dome 23 ha là che il bosc al à tornât a cjapâ pît in vastis areis  dilunc dai cors di aghe (150 ha). La tutele dai prât relits e la gjestion di chestis gnovis superficiis forestâls a rapresentaran un dai cardins de future gjestion dal parc, tant che l’indreçament dee ativitâts agriculis viers une gjestion teritoriâl rispietose dal ambient, incentrade su un turisim a bas impat e su la produzion di prodots biologjics.

Dentri dal Parc a cjatìn di fat ancje cualchi zone vocade a di un turisim vert, come il complès di Vile Otelio cul so zardin a la taliane e il parc paesagistic che i stâ dongje (frache par visualizâ la mape), e come ancje lis stessis aziendis agriculis che a son dentri dal Parc.

Farniis monumentâls, boscs umits a galerie, prâts, pascui, flums, rois, risultivis e une faune siore in speciis, che a partegnin no dome a chês categoriis “che a si viodin ben”, come i mamifars e la avifaune, ma ancje e soredut ae faune a tuart considerade “minôr”, che si mostre dome al voli pazient e apassionât (ittiofaune, erpetofaune e entonomofaune), a acetaran il visitadôr, cuntune bieleçe simpri plui grande vie vie che a passaran i agns in une atmosfere di “bon vicinât” tra omp e nature, atmosfere che e rapresente l’obietîf ultin di dut ce che al vignarà pensât e realizât tal Parc.

 _{foto realizadis di Fotostudio Cocco}