Lis frazions

Si sa par sigûr che tal 1257 al jere a Ariis un cjistiel che al fo dât in feut dal Patriarcje Gregorio di Montelongo ae famee di Wrusberg. Dopo diviersis vicendis il cjistiel al passà in proprietât al Cont di Gurize che al insedià culà i Siôrs di Ariis. Tal 1336 al deventà proprietât dai Siôrs Savorgnan fin al 1492, cuant che al fo dividût di autoritât tra i cuatri fradis Savorgnan. Tal secul XVI, dopo la costruzion de fortece di Palme, Ariis al pierdè ogni impuartance strategjiche e al decjadè.
Il cjistiel al fo a planc disdrumât e tal so puest al nassè un palaçot signorîl: la Vile Otelio di cumò.

Il paîs di Ariis al rapresente un cuadri di sigûr unic de plane furlane, e il so patrimoni naturalistic inestimabil al è completât de presince, dongje de Vile, di une bande di un parc paisagjistic bielonon (il Parc di Vile Otelio) e di chê altre de gleseute di San Jacum Apuestul, li che si puedin amirâ frescs dal XV secul.

A pôcs pas dal centri, cun di plui, in front ae luminose Vile Deciani-De Eccher, si cjate un maraveôs mulin a aghe tradizionâl, fat sù jenfri il IXX e il XX secul, in dì di vuê ristruturât in mût rigorôs e perfetementri funzionant.

FLAMBRUÇ

Dôs a son lis realtâts storichis plui impuartantis che a caraterizin il centri abitât di Flambruç.

La Glesie di Sante Marie dal XVII secul d.d.C., siore di relicuiaris e di robis antighis e sacris conservadis cun gjelosie. La glesie e je stade insiorade dal ultin cont Girolamo di Codroip, cun mobilie, marmui preseâts e colonis di valôr indiscutibil. Culì si cjate un interessant vueli su tele di anonim databil al XVIII secul, che al figure la Deposizion.

La vile Badoglio-Rota e va indaûr al XVIII secul, ma al samee che e sedi stade tirade sù parsore dai rudinaç di un cjistiel antîc.

Tal centri abitât di Sivian, passât fûr par fûr de strade provinciâl n. 7, e je une glesie dal XVI secul d.d.C. dedicade a San Marc patron de Serenissime, tant che testemonein i doi leons alâts che a son te jentrade, che la lôr dominazion pal passât e rivave fintremai achì. Dute la zone e je plene di risultivis, par vie che si cjate tal mieç jenfri il flum Stele e il Tai, so principâl afluent.

SELE

E je la plui piçule frazion di Rivignan, e conte dome uns cuarante residents, ma e vante un ciert passât di storie. La gleseute dal XV secul d.d.C. dedicade a San Leonart e je a aule retangolâr cun coro cuadrât cuntune volte a crosere che i stâ parsore. Tal mieç dal paisut al è un palaç signorîl, cumò clamât "Vile Romanelli" dal non dai ultins proprietaris.

Il steme in piere cun trê gjai che e je su la façade al dâ za idee dal aspiet nobil: al fo cuistât tal 1772 di bande dai Conts "Belgrât" de Serenissime. La borgade e je vignude sù ator ator dal nucli dai Conts proprietaris di un timp, i "Belgrât" apont, famee daspò clamade (tor il XIX secul d.d.C.) "dal Patriarcjât", parcè che e jere a stâ tal palaç li che cumò e je la sede de Provincie di Udin.