Fiere dai Sants

Al sarès une vore dificil stabilî tropis che a son stadis fin cumò lis edizions de “Fiere dai Sants” di Rivignan. Un manifest di pôc riscuviert e publicât sul libri “Rivignano. Un sècul di vite”, al documente l’event tal lontan 1914, ripuartant, ancje, lis peraulis “L’antica annuale...”, e fasint duncje pensâ a origjinis ancjemò plui antighis. Altris notiziis a son pôc claris e, forsit, a mertaressin analisis e ricercjis plui amplis e aprofondidis che purtrop a vuê no si son mai concretizadis.

Ce che al si sa, dut câs, al è che la Fiere e rapresente di simpri un apontament di impuartance fondamentâl inte vite de comunitât. Di fat, come zà memoreât, lis sôs origjinis a son lontanis tal timp, cuant che lis animis dai muarts a comparivin ai vîfs, cuant che Striis, Orcui e Cjalcjuts a jerin simpri presints te contis che i vecjos a fasevin ai fruts par passâ il timp intes lungjis seris dal invier. Di râr a rivavin ancje i viandants, che a vendevin imprescj di len o puare int che e domandave la caritât, e chescj a puartavin storiis gnovis cjapadis sù tal lôr torzeonâ: lu fasevin par disdebitâsi di un plat di mignestre.

Une altre figure centrâl tes contis dai vecjos a jeris lis Aganis, o ben lis striis buinis, creaturis blancjis e irazunzibilis che a comparivin dispès parmìs dai cors di aghe. La lôr ativitât principâl e jere chê di lavâ i linçûi par dopo metiju a suiâ parmìs des gravis dai flums e tai verts prâts dongje, formant cussì une distese blancje tal stes timp sflandorose e spaventevule.

La atmosfere de Fiere di Rivignan si la cjate ben interpretade intun famôs toc leterari dal secul stât. Di fat, ai 2 di Novembar dal lontan 1856 Rivignan e fo visitade di Ippolito Nievo, che vie pe sô permanence li dal Cjistiel di Frate, su consei di amîs, al rivà in paîs par partecipâ ae fieste dai dîs dai muarts, cussì origjinâl e famose di sedi za ta chê volte cognossude in dut il Friûl e oltri. La visite e fo cussì impuartante pal poete, di dedicâi un cjapitul dal so romanç storic-autobiografic “Le confessioni d’un italiano”.

Tai ultins agns cheste manifestazion, inmaneade de Aministrazion Comunâl, e je deventade simpri plui rilevante e plene di apontaments di notevul spessôr, tant di riclamâ visitadôrs di dute la nestre regjon, di chês dongje e ancje dal cercin european di mieç.

I apontaments plui significatîfs e peculiârs de Fiere dai Sants di Rivignan a son tai dîs 31 di Otubar, 1 e 2 di Novembar.

La zornade dai 31 di Otubar e je dedicade a lis cocis, prodot tipic de fiere ancje dal pont di viste gastronomic, tes sôs diviersis formis, e a lis striis, in particolâr chês di aghe dolce (lis “Aganis” inte tradizion mitologjiche dai teritoris di risultive dal medi e bas Friûl). Grancj e fruts piturâts e mascarâts a van ator pes stradis intune atmosfere incjantade e ireâl, spietant la folcloristiche calade de strie dal cjampanili.

I tancj apontaments de prime dì di Novembar a trasformin la place intun teatri bocon, li che recitazion, imagjinazion e vite reâl si misclicin intun balenâ di emozions, colôrs e sugjestion. Il festival dai artiscj di strade al à viodût esibîsi disinis di compagniis di fame nazionâl e internazionâl che a àn regalât ridadis e ligrie a grancj e piçui.

E par ultin ai 2 di Novembar, zornade li che par dut si celebre il ricuart dai muarts, che al rapresente la origjin de Fiere dai Sants di Rivignan, parcè che achì storichementri ae malinconie e al cidinôr si sostituìs une grande fieste, cun bai, musichis e un grant marcjât che al jemple lis stradis dal paîs rapresentant, duncje, une peculiaritât a livel nazionâl.

A Rivignan cheste zornade e je di secui un dì di fieste. Tant al è vêr che, graziis a recentis indagjins, si è scuviert che la zornade e je storichementri dedicade al marcjât dal bestiam che, probabilmentri, al scomençà ae fin dal XV secul. Tal cricâ di chest dì il proprietari dal font li che al si faseve il marcjât al vierzeve i portons e subit il “broili” al vignive ocupât par dut il dì di nemâi e int. Cheste tradizion e je restade compagne tai agns, lis personis a àn continuât a lâ al marcjât par comprâ no dome nemâi o bestiis di curtîl ma ancje stofis, vistîts o cierts gjenars alimentârs. Al jere moment di incuintri pe comunitât dal paîs ma ancje dai paîs dongje, par vie dal fat che la zornade e continuave fin a dute gnot. Di fat, une volte sierâts i portons dal marcjât si vierzevin chei in len dal breâr, o ben il taulaç par balâ metût inte place grande li che si fasevin i bai che a coinvolzevin i fantats dal paîs, ufrint lôr un moment unic par cognossisi e socializâ. Vuê il marcjât, lant daûr dai mudaments de societât, al è viert a cualsisei gjenar di cumierç fasint sedi cussì la Fiere simpri floride e coinvolzente.

www.fieradeisanti.it